اعتقد ان تويتر زى البرادعى تمام، مرحلة ادت دورها بشكل ممتاز فى خدمة مصر
والمفروض انها مثل اى مرحلة تبدا وتنتهى
ومرحلة تويتر انتهت
وعدم انتهائها يأخذ بشكل مباشر من رصيدها الايجابى
وده اللى حاصل حاليا لتويتر
بعد الثورة دخله ناس كثيرة قوى من السمعة اللى اكتسبها ايام الثورة (بقى بيلملم يعنى )
لكنهم دخلوا فى نهاية المرحلة التويترية الايجابية
ونتيجة لهذا اصبح لابد لتويتر ان يبدا مرحلة جديدة ليستوعب الجدد
فبدا تويتر مرحلة التهيس والفوضى والاطفال والتفاهة
واخشى بعد القليل يكون تويتر عبء على الثورة وعلى مصر
هو الان مجرد مشكلة فقط للثورة ، على ما ارى
خصوصا فى ازدياد كمية الاخبار الكاذبة والاشاعات والمبالغات بشكل فوق الوصف
ايضا فى المرحلة الايجابية كان ذلك موجود ولكن بشكله الطبيعى ومع القدرة على فلترة اى تويته تحمل خبر
لكن الان اصبح مستحيل
كان خبر تويتر فى المرحلة الاولى الايجابية صادق حتى يثبت كذبه
والان خبر تويتر فى المرحلة الجديدة السلبية كاذب حتى يثبت صدقه
والحقيقة من بداية تلك المرحلة الاخيرة فى تويتر بعد الثورة مباشرة
اصبح دخولى لتويتر شبه منعدم
مرة كده كل اسبوعين تلاتة مثلا لمدة نص او ربع ساعة
واقرف من كل اللى موجودين على تويتر ومن كل المواضيع المطروحة
اللى هى فى الغالب اصبحت مواضيع اللى فاكرنى كيت وكيت ما يتابعنيش
وانا عملت النهاردة كام بلوك لكام واحد
وانا عملت النهاردة كام تويتة
صحيح الموضوع كان موجود فى المرحلة السابقة ايضا لتويتر
لكنه ايضا كان من المواضيع الهامشية جدا والتى تكون محل الهزار وليس الجد كما الان
طوال فترة وجودى فى تويتر كنت اتبع منهج ان لا اتابع الا اقل القليل جدا كاشخاص
ومش اى حد اوافق على انه يتابعنى ولا انا اتابع اى حد والسلام
وتكون المتابعة الافضل لتويتر من الهشتاجات الخاصة بالموضوع اللى يهمنى
لذلك دخلت تويتر واخرج منه الان بعدد متابعيين لى لم يتجاوز 40 فرد اعتز بكل واحد منهم لكن انا اللى مختارهم مش هم اللى مختارنى
وعدد حوالى 27 فرد اتابع تويتاتهم بشكل مباشر ومتابعة بقى معظم او كل من على تويتر من الهشتاج
وطبعا الاعداد دى اى واحد عامل اكونت جديد لسه ما كتبش فيه تويته واحدة يبقوا اقل من اللى عنده سواء متابعهم او متابعينه
وبالمناسبة فان عدد التويتات التى كتبتها على تويتر للان هى 840 تويتة
وبرضو المفروض فى منهج تويتر دول يتعملوا فى اسبوع مش سنتين هههههههههههههههه
افضل هشتاج تابعته واسعدنى بترتيب اسبقية السعادة
#sidibouzid
#Egypt
#Jan25
افضل من تابعته بالترتيب ايضا
@ONtveg
@ONtveg
أوشة أخت مليجي @oshaokhtmeligi ( ده اكونت لنوارة نجم )
@oshaokhtmeligi ( ده اكونت لنوارة نجم )
YosriFouda Yosri Fouda
اما افضل حد تابعنى خلال رحلتى فى مرحلة تويتر كان الاكونت ده هههههههههههههههه
وافضل تويتة كتبتها من وجهة نظر اهل تويتر من عدد الريتوت اللى عملته مش هقدر انقلها واقولها هنا على الجروب للاسف ههههههههههههه
افضل تويتة تابعتها وعملتها فى الفيفورتس هى تويتة لنوارة نجم ليلة 25 وكان صباحه الثورة على ما اذكر وكانت رد على تويتة للدكتور محمد البرادعى
كان بيقول فيها الراجل قد حان وقت التغيير فردت نوارة عليه لانه كان خارج مصر وقالت :
oshaokhtmeligi أوشة أخت مليجي
حسب التوقيت المحلي لمدينة التويتر وعلى السادة المقيمين خارجها ما يدخلوش عشان صحتهم الجنسية rt @ElBaradei قد حان وقت التغيير
اخيرا
فانا كنت اعشق تويتر ولا اطيق الفيس بوك
الان ما زلت لا اطيق الفيس بوك واترك تويتر
فشكرا تويتر على مرحلتك الايجابية الرائعة قبل الثورة الى يوم 20 فبراير 2011
ووداعا تويتر فى مرحلته السلبية على الثورة وعلى مصر ، ما تلزمناش
ليست هناك تعليقات:
إرسال تعليق